කව්මුතු | Kavmuthu: කවි

Showing posts with label කවි. Show all posts

ආ ගිය මතක

Posted in Labels: Sinhala, කවි | Saturday, July 25, 2026

මෙතෙකැයි කිව නොහැකි

කතා නම් වේ අපමණ

තිතක් නැතුවාට අග

නිහඬව ඉවර වුණ

කාලයට මුසුව

නිධන් කෙරුවාට සුවඳ

කළු ගලත් සිදුරුව

සුපිපෙන්නේ ඒ හුස්ම

හිතක පතුලක පැහැය

ගැඹුරේම සිඳුනාට

පිපෙන ලා පුංචි මල්

ආ ගිය මතකමය

Read Users' Comments (0)

අවසාන අස්වැන්න

Posted in Labels: Sinhala, කවි | Sunday, May 26, 2024

(හේමන්තය නිසාවෙන් පූදින්නට නොහැකි වූ මල් පොහොට්ටුවක කවිය)

මුකුලිත නොවී

සඟවමි හුස්ම පොද.

හිමිදිරියෙ

ගල්ගැහෙන්නට,

පොරබදින කඳුළු තුළ.

2018.11.04

Read Users' Comments (1)comments

සීතල සුසුම

Posted in Labels: Sinhala, කවි | Friday, May 17, 2024

ඇසි පියන් දෙක සැලෙන වේගෙට

ගැහෙන හිතෙ ගිණි බියක් හිරකර

ඉමක් නොපෙනෙන දිගන්තය වෙත

පණඩිංග මගෙ ගිහින් නොකියම

තාලයක් නැත හිත බිඳෙන රාවෙට

සුසුම් තැවරුණු මතක පොකුරට

සෙනෙහෙ තවරා හාදු වැස්සක

හුස්ම බදාගමි සිහිනයක් තුළ

එළිය මැද රළු අඳුරෙ සීතල

හාරවුස්සා සොයමි මදහස

කොහොමහරි ඉන් ටිකක් ලැබුණොත්

හොඳටෝම ඇති ළය සනසගන්නට

16.03.2024

#Gaza

Read Users' Comments (1)comments

සිහිනයක්(ම) වූ සිහින සිත්තම

Posted in Labels: Sinhala, කවි | Monday, December 16, 2013

ඉදුසමුවෙ සත් මහිම ගලපා
පුර හඳේ රන්කිරණ හා
ස්නේහයේ අරුමය කියා දුන්
සිහින සිත්තම බොඳ වුණා

පිපෙන්නට පෙර සුවඳ විදහා
මිහිරි හඳ ඇඳි රේඛා සොබා
හද විමන් දොරකඩ සතපවා
සිහින සිත්තම දුර ගියා

අහස් කුස දුර දිලෙන තරුවල
මිරිඟු දිය සඟවා තබා
වසන්තය හද ළඟට ගෙනැවිත්
සිහින සිත්තම ගොළුවුණා

ළවැලි මත ඇති මතක සළකුණු
දරා සිටියත් සැඩ සුළං නැගෙනා
සිනහකැන් අකා මකා සැහැසිව
සිහින සිත්තම නික්මුණා

සිතිජ ඉම්වල සිතුමිණි සඟවා
දුකඳුළු දස අත විසිරුවා
හද පවුරක රූ කැටයම් කොට එ්
සිහින සිත්තම ගිලිහුණා

2012.02.07

(ලංකාවිත්ති - 2012 අප්‍රේල් කලාපය)

Read Users' Comments (3)

ප‍්‍රාර්ථනා

Posted in Labels: Sinhala, කවි | Saturday, November 23, 2013

තවත් උදෑසනක්!
දොඩමළු ප‍්‍රාර්ථනා
හේමන්ත මීදුමේ
පාවෙයි....

Read Users' Comments (2)

වසන්තයත් යන්න ගියා නම්

Posted in Labels: Sinhala, කවි | Thursday, November 14, 2013

වසන්තයත් යන්න ගියා නම්
ගිම්හානෙත් යන්න ගියා නම්
හේමන්තෙත් යන්න යනවනම්
කුමට ඉන්නෙ තවත් බලා
සිසිරයෙ සසිරිය එනවද පායා

කැකුළු පීදුනා
මල් ඵල හට ගෙන
සුවඳ තැනින් තැන පියෑඹුවා
ඉරට හඳට හාද වුණත්
අවසානයේ මලට මෙන්ම
මල් සුවඳට
සමුගන්නට වෙලාව ආවා

දැන් කොළත් හැලෙනවා
දුකින් වුණත් හිමින් වුණත්
හැලිලම යනවා
ටික දිනකින් සීත ඒවි
නිරුවත් තුරුවැල් සිඹීවි
පමා නොවී හිම පියලිත්
අහස මවාවී

2013.08.30

Read Users' Comments (1)comments